3M

 Alus ni Hula-hula tar songon on ma:

Mauliate ma di hamu parboruoan nami raja manurung di na di pasahat hamu panghataion jala mangido panuturion hamu sian hami horong ni hula-hula dohot tulang mu. (Kemudian berpaling kearah rombongan Hula-hula & Tulang).

Suang songoni ma di hita horong ni hula-hula dohot tulang sada do hita pomparan ni upputa siahaan somba debata, ala martampuk bulung marbona sakkalan hami ma sian pomparan ni opputta juara monang na Gabe hula-hula, hamu  ma sian raja ni anggi doli nami tuan pangerlam na Gabe tulang nunga tangkas rap umbegesa hita di na mangido panuturion parboruonta marga manurung tu hita asa mardos ni roha ma hita ise ma hita na pasahat panuturion ? (Somalna hula-hula tangkas do na pasahathon panuturion).  Jadi dos ma rohanta sada silompa gadong dua silompa ubi ma ate ? Molo tung hami hula-hula pe na pasahathon panuturion sude ma hita dapotan uli ate !

Di hamu parboruonnami, Raja manurung nunga sada roha nami sian horong ni hula-hula dohot tulangmu, molo sian hami horong ni hula-hulamu, dohonon-nami ma songon hata ni natua natua

Aek godang ma inna tu aek laut

Dos ni roha do antong sibaen na saut

Nunga tangkas hu ida jala hu paihut- ihut hami panghationmuna jala di dos ni roha muna, asa dohonon nami

Balintang ma pagabe, tumundalhon sitadoan,

Ari mu ma antong namarhula-marboru gabe, molo tangkas hamu marsipaolo-oloan.

“Songon ima hata sian hami horong ni hula-hula dohot tulang. Ulahon hamu ma Botima!”

Gabe ma hita jala horas, tadok mauliate tu Amanta Debata na mandongani hita sadarion. Nungnga marsipaunduhan hamu jala masipaoloan di angka nanaeng patupaonmuna. Sisada uli nama hamu na dua hasuhuton di ulaon on, jala sisada gora.

Dibahen i, sai masiamin-aminan ma hamu di ulaon on, songon lampak ni gaol, jala masitungkol-tongkolan songon suhat di robean.

Taringot anak dohot boru na tahatai sadaarion, ba on ma dohonongku, ba sai marrongkap ma nasida Jala :

Eme Sitambu tua ma parlinggoman ni siborok

Amanta debata do sileon tua, luhut na ma hita diparorot