Hamu ito ! Dipaporsanthon Tuhanta do tu hamu nuaen sada sitaonon na dokdok. Huantuasi hami do ito, tung mansai borat do sitaonon on tu hamu na songon udan na so hasaongan, songon alogo na so hapudian. Alai ingot hamu ito, ndada holan hamu mamorsan na dodok i, dohot do nang hami hulahulamuna.
I ma umbahen na ro hami nueng mandapothon hamu tu son laho mambahen tujungmuna. Simbol manang tanda do ito on, paboahon tu hamu na adong do hamu hulahulamuna na mangkaholongi hamu. Nuaeng ito jalo hamu ma tujung on. (Ditunjungkon ma Ulos i tu atas simanjujung nasida, jala diuduti hatana).
Jadi ale ito, songon tujungi naung ampe nuaeng di manjujungmuna, songon i ma dohot holong ni rohanami dohot tangiangnami mandongani hamu dohot angka berenami i sude. Angkup ni i, ingot hamu ito, hatani Tuhanta na mandok: “Ahu do ama di angka na mabalu dohot diangka dakdanak na so marama”
Jadi na mabalu na olo manjalo jala mangkaporseai hata i ndang pola be mabiar manang ganggu di hangoluan siapari, ai Tuhanta do silehon I sude. On pe ito, sai hipas ma angka berenami i, songon i nang hamu sai hipas sahat tu na sarimatua patureture Nasida. Botima.
- MAMUNGKA TUJUNG
Songonon ma pangulahonna:
- i. Parjolo mambungka tujung
Nuaeng hubungka tujung on anggiat ma mungkap nadokdok natinaon mon, jala ro ma panggabean parhorasan tu ho boru/ito/lae tumpahon ni Amanta Debata
- ii. Manuapi
Husuapi ma ho boru/ito/lae, ias ma ilu sian simalolongmu. Angka silas ni roha ma dipasahat Tuhanta di ho boru/ito/lae dohot di hita saluhutna tu joloan ni ari on (huhut disuapi tolu hali)
- iii. Mangalehon mangan
Pangan ma indahan dohot dengke on asa margogo ho mangula ulaonmu asa boi parmudumuduonmu anakhonmi (huhut disulangkon 3 hali)
- iv. Painumhon
Inum ma mual sitiotio on asa anggiat ma tio angka pansamotan tumpahan ni Amanta Debata di borungku/ibotongku/laengku nang di hita saluhutna (huhut dipainumhon tolu hali)
- v. Pasahat parbue gabe
Pir ma tondim pir sahalam mangiringiring sude pomparanmi donganmu sarimatua (huhut di jomput jala dibahen disimajujung ni namabalu). Dung sidung didok hatana, disaburhon ma parbue i tolu hali tu ginjang ni nahundul disi huhut didok, Horas…Horas…Horas.
Ditingki namamungka tujung, tongtong do hulahula pasahat dengke tu pamoruonna.